Samsung Galaxy S25 Ultra 詳細評測

今日想同大家講嘅就係最近用咗一排嘅Galaxy S25 Ultra。當初我對呢部機嘅期待其實係幾高嘅，諗住今年Samsung會帶啲乜嘢驚喜畀我哋。不過用咗一排之後，個感覺就有少少mix，今日就同大家分析下呢部Galaxy S25 Ultra嘅使用體驗。

設計與外觀

今年整體嘅設計其實同上年差唔多，仲係保持住霧面機背，但係有一個好明顯嘅分別，就係部機方正啲，角位圓潤啲，咁樣會令部機睇落係靚咗嘅。不過個缺點就係比起之前嗰代嘅邊角會哽手一啲。但今代部機係輕咗，咁就冇咁墜手。

老實講，其實呢個設計我係幾鍾意嘅，就算佢唔改我都覺得冇乜所謂。至於機身嘅顏色就偏向金屬色系，我個人就比較鍾意之前嗰啲，例如黃色、綠色嗰啲嘅配色。

鏡頭模組

講到鏡頭模組，今代有個好特別嘅設計，就係你會見到啲鏡頭出廠嗰陣時就已經跟比你好似有個鏡頭蓋咁樣，令到你係忍唔住想用指甲撩佢出嚟，唔係好明點解要加舊嘢喺上面，即係好似好睇啲。

軟件與用戶體驗

軟件方面，One UI 7今次嘅更新做得幾好，整個用戶體驗更加似iPhone。例如係張通知功能表左右分開兩邊，仲有個好似Dynamic Island嘅Now Bar功能。如果你又用緊Samsung galaxy watch、Samsung平板或者係galaxy book嘅話，你就會發現佢哋整體嘅生態系統做得幾完整。

你用得越多Samsung嘅產品，佢俾你嘅整體ecosystem嘅感覺就會好方便。我自己就都多Samsung嘢，所以用落覺得好舒服。

螢幕表現

螢幕屏佔比做得好好，今代會再好咗少少，亮度表現都好好，佢嘅vision booster戶外睇真係好舒服。而上代開始加咗嘅防反光塗層都做得幾好，出街果種因為猛太陽而導致嘅反光，用起上嚟嘅不適感覺係比其他機少好多。

不過PWM調光就有進步空間，Samsung一路都冇同其他內地品牌去鬥佢嘅PWM調光表現。如果對OLED頻閃比較敏感嘅人用落就可能冇咁舒服同埋冇咁護眼。

相機性能

相機方面，今代鏡頭繼續用2億像素嘅主鏡頭，同上年一樣嘅sensor，仲有一個5000萬像素嘅5倍遠攝鏡。今年升級咗嘅5000萬像素超廣角鏡，同埋一個唔係好起眼嘅1000萬像素3倍鏡。影相質素其實都幾好，Samsung呢幾年嘅調校將啲顏色Tone Down咗，整體偏冷色調，睇落唔會好重味精感。

而夜拍嘅運算同埋雜訊控制都有咁上下嘅水準，佢以現有嘅sensor用運算去改進整體嘅拍攝效果，所以如果呢幾代用開嘅人，你就唔會有好新鮮感。

拍攝功能與特點

拍攝功能方面，佢Set Filter就換咗，同iPhone嘅功能類似，你就可以自由調較Filter嘅設定。不過佢嘅運作模式就唔似得好似Apple咁樣，佢只係Filter嚟嘅，不過你影完之後後制係可以拎返走佢，甚至乎攞你最鍾意嗰張相去抄佢色調落嚟。

所以其實你話佢悶都係嘅，但係你可以玩嘅都可以玩嘅，即係你有Filter畀你玩啦，有Expert RAW畀你玩啦，睇你有冇心機嘅啫。

影片拍攝能力

對於拍片方面，Samsung拍片嘅色調就比較重味精，同埋個調較唔係好穩定，所以其實拍片就唔好用嘅我覺得。而家有Log嘅話，對於顏色有要求嘅人就可以用，或者相應比較高動態範圍嘅人就會好有用嘅功能。

Log模式可以拍到4k 120p，主鏡頭同超廣角都得嘅，但係暫時主要問題就係夜拍比較多雜訊。

電池與充電速度

至於充電速度同埋電池續航力方面，半個鐘已經叉到72%，而電池容量就維持喺5000mAh，新CPU嘅Power efficiency就好咗。所以測試落佢嘅續航力就比上年好咗少少，但係當用一輪再勁啲嘅電池嘅手機轉返嚟用，例如之前試過嘅Oppo，就好明顯被比下佢。

當然你要一日電量係絕對冇問題嘅係可以嘅。

Galaxy AI與功能

首先係Galaxy AI，雖然佢嘅圖像效果係幾靚，尤其係佢個Magic Eraser，整個效果係好過隔離水果公司好多嘅。新功能文字變圖像都做得幾好，起碼整完你會覺得Relevant，同埋你會想用嘅圖同埋都幾Cute嘅。

語音轉文字功能做得好好，佢嘅廣東話語音轉文字功能做得好準確，但係要逐段錄音咁撳轉錄，冇得一次過搞。

效能與穩定性

至於效能發熱同埋穩定性，如果淨係睇跑分嘅話，佢好好嘅，勁高分。而今代嘅Vapour Chamber升級咗，理論上可以改善部機嘅效能同埋散熱表現，但係結果佢跑出嚟嘅效能穩定度就未如理想。

至於打機，幾隻食效能嘅game都試過，就算佢會降頻，推盡60fps都ok嘅，難唔到佢。

總結

總結嚟講，Samsung Galaxy S25 Ultra整體嚟講都講到厭，其實全部嘢都係一個幾好嘅平衡。主要我係覺得同上一代甚至前一代嘅體驗係差唔多，Samsung可能真係唔想你年年換機，反而佢想做好啲軟件，做好啲支援，令到你部機可以用得耐啲。

你手上嗰部S23或者S24 Ultra可以用多幾年先，唔使咁急住換機先。

你又覺得今次Samsung Galaxy S25 Ultra有啲咩鍾意唔鍾意嘅地方呢？記得留言話我知。